„Ef
ég skyldi einhverntíma komast í vandræði
þá vildi ég vera meðal ítala.“
- Halldór Laxness.
Lestu meira um hvernig íslensk skáld hafa
ort og skrifað
um Ítali og Ítalíu.
UMSAGNIR
„Við
erum búin að vísa mörgum í
hús til ykkar því af þeim vefjum
ítölskum sem við skoðum þá
held ég að ykkar geri betur en flestir að
vísa til vegar á Ítalíu og
ekki síst í Róm.“
„...hagnýtur
og
hentugur vefur sem fær nánast fullt hús
stiga út á upplýsingagildið
og skemmtilegheitin ...“
„Við
prentuðum út margar síður af þessum
snilldarvef og notuðum sem biblíu á
10 daga ferðalagi okkar um Róm.“
Tár, bros, takkaskór og eitt stang frá signore Zidane
Ritstjóri Rómarvefjarins er þekktur fyrir margt annað en áhuga á tuðrusparki. En, þegar heimsmeistaramót í fótbolta er annars vegar, hvað þá að Ítalir leiki til úrslita, þá er nú komið tilefni til að gefa því gaum.
Ég veit svona nokkurn veginn út á hvað fótbolti gengur. Það eru ellefu leikmenn í hvoru liði og skipta með sér gríðarstórum grasivöxnum leikvelli. Hvort lið á síðan að sækja yfir á vallarhelming hins og helst að koma boltanum í þar til gerðan ramma; þá er mark. Það má sparka í boltann, skall'ann en alls ekki taka hann höndum nema þegar hann lendir utanvallar; þá má tvíhenda honum inná völlinn og svo má sá sem vörð stendur um rammann eftirsótta, svo nefndur markmaður, bera hendur fyrir höfuð sér og rammans og fara öllum sínum höndum um knöttinn eins og hann vill. Helst má ekki toga í aðra leikmenn og alls ekki hrinda þeim, hvað þá kýla þá eins og tíðkast í annarri svokallaðri íþrótt. Það má heldur ekki skalla fólk og trúlega ekki stanga heldur. Til þess að allt fari vel fram og samkvæmt reglum þessum er til staðar alvaldur dómari.
Suður Spáni á er sparkið giska vinsælt, en þar stundar alþýðan það líka að hópast í kringum svo kallaðan matador sem búinn er rauðu klæði og vel ydduðum spjótum. Inn á hringleikvang er síðan hleypt blásaklausum bola sem samkvæmt náttúrunnar skikkan tekur að stíga dans við matadorinn. Dansinn er einhvern veginn svona: Matadorinn viðrar teppið sitt rauða og bolinn verður alveg snar og æðir mót teppamanninum að stanga hann, en sá veit betur, hefur teppið á loft og boli þýtur fram hjá og hlýtur að launum spjót í síðu. Olé.
Ítalir og Fransmenn léku til úrslita í heimsmeistarakeppninni; tvær sjóðblóðheitar Evrópuþjóðir. Leikurinn gekk nú svo og svona, en þegar hann var búinn var hvort lið búið að skora sitt markið og taldist jafntefli. Það þykir ekki nóg í úrslitakeppni og því var keppninni framhaldið. Þá fór ekki betur en svo að forystusauði Frakka fannst að sér vegið af einum leikmanni Ítala, setti undir sig höfuðið og stangaði manninn sem mannýgt naut eða hundfúlll hrútur. Dómaranum fannst þetta ekki gott og dæmdi manninn útaf. Að framlengingu lokinni var staðan óbreytt og þá tekið til við að keppa í vítasparki; fimm tilraunir á hvort lið. Þeim bláu, Ítölum það er, tókst að skila af sér fullu húsi en Fransmenn brenndu af einu sparkinu. Og þá lágu úrslitin fyrir.
Margir eiga eftir að sýt'ann Zidane nú þegar hann lætur af öllu tuðrusparki eins og hann var áður búinn að lofa. Og sennilega á Zidane eftir að sýta þetta stang sitt, þetta frumhlaup tuddans í sér sem bara varð að setja undir sig höfuðið og brýna hornin á ítalska varaliðanum Materazzi. En svona fór það. Zidane stangaði, kannski sá hann rautt, en það hefur trúlega ekki verið neitt á við spjaldið rauða sem dómarinn dró úr rassvasanum og hóf upp hátt mót himni og reiði guðanna.
Annars merkilegt þetta með Materazzi. Kom inn á sem varamaður, fékk svo dæmt á sig vítaspark sem Zidane skoraði úr. Skoraði síðan sjálfur jöfnunarmarkið. Varð svo sundurorða við Zidane sem varð til þess að sá síðarnefndi stangaði hann í bringuna og var fyrir það vikið af velli. Skoraði svo eitt af mörkunum fimm í vítasparkinu. Materazzi var þá matador eftir allt saman og Zidane tuddinn. Og ólympíuleikvangurinn í Berlín eitt stórt nautaat.
OLDBUS Þessi er nú enginn superbus heldur strætó af eldri gerðinni sem þó var ekki óalgeng á götum Rómar þegar ritstjóri dvaldi borgina.
21.06.2006 Súperböss Þegar sá sem hér skrifar var í menntaskóla og las um Grikki og Rómverja til forna varð honum einn kóngurinn minnisstæðari en aðrir. Sá var af etrúskum ættum og varð síðasti konungur í Róm áður en ríkið var gert að lýðveldi. Kóngur þessi hét Tarquinius Superbus og ríkti á árunum 534 - 509 f.Kr. Þarna var sko nafn sem maður átti óvenju auðvelt með að muna á prófi: Síðasti kóngurinn í Róm? - Jú, jú, hann hét Tarkíeitthvað Ofurstrætó!
Gömul latnesk embættisheiti hafa víða og lengi verið notuð. Hér uppi á Íslandi má t.d. nefna að stjórnarmenn nemendafélags Menntaskólans í Reykjavík skarta latneskum eimbættisheitum; inspector, scripa og quaestor. Tignarheiti páfa á latínu er pontifex maximus, en það þýðir í raun yfirbrúarsmiður og var heitið á fornu embætti æðstaprests í heiðnum sið. Keisarar Rómar bættu þessu embætti síðar í tignasafn sitt og þaðan færðist það yfir á páfana sem voru sannarlega arftakar keisaranna.
En aftur að Tarquiniusi. Hafandi þetta fína og gagnsæja nafn úr fortíðinni finnst
ritstjóra að yfirmaður almenningssamgangna í
Róm ætti að bera titilinn Superbus. Er því
hérmeð komið á framfæri.
29.05.2006 Rómarvefurinn 5 ára
Ferða-, menningar- og söguvefurinn RÓMARVEFURINN
fagnar fimm ára starfsafmæli um þessar mundir.
Vefurinn er, eins og nafnið gefur til kynna, helgaður
menningu og sögu Ítalíu með sérstaka
áherslu á borgina þangað sem „allir
vegir liggja“.
RÓMARVEFURINN er yfirgripsmikill vefur og sá eini
sinnar tegundar á Íslandi. Vefurinn hefur það
að markmiði sínu að miðla vönduðum
upplýsingum um sögu og menningu Ítalíu
í nútíð og fortíð ásamt
greinargóðum upplýsingum fyrir íslenska
ferðamenn. RÓMARVEFURINN leggur mikið upp úr
því að upplýsingar séu miðaðar
við íslenska ferðamenn, að allt efni sé
á íslensku og að birta efni sem segir frá
kynnum Íslendinga af Ítalíu.
RÓMARVEFURINN er uppfærður reglulega og oft
fjallað um málefni líðandi stundar á
Ítalíu. Stöðugt bætist við
efni vefjarins. Meðal efnis í vefnum eru ferðaupplýsingar
um Róm, greinar um páfa og Páfagarð,
stjórnkerfi Ítalíu, samskipti Íslands
og Rómar fyrr á tímum, óperu og
myndlist, matarumfjöllun og uppskriftir - auk ýmissa
pistla og greina annarra um aðskiljanlegustu efni.
RÓMARVEFURINN er vel sóttur af fólki á
öllum aldri, ekki síst þeim sem eru að
hugleiða ferð til Ítalíu. Vefurinn er
einnig töluvert notaður af nemendum grunn- og framhaldsskóla
og svo þeim sem hafa áhuga á sögu Rómar.
RÓMARVEFURINN hefur fengið góða umsögn,
jafnt hjá almenningi sem fagmönnum, og er t.a.m.
skilgreindur sem námsefni á vef Menntamálaráðuneytisins,
Menntagátt.is.
RÓMARVEFURINN er einkaframtak Kristins Péturssonar.
Hönnun vefjarins og mest allt efni er á hans könnu,
en nokkrir höfundar aðrir hafa lagt vefnum til efni.
Kristinn bjó um tveggja ára skeið í
Rómaborg og heillaðist svo af sögu og menningu
borgarinnar að hann mátti til með að gera
þessu skil í máli og myndum; og vefurinn
varð fyrir valinu.
RÓMARVEFURINN tekur fagnandi við ábendingum
frá netverjum, ferðasögum, pistlum og myndum.
LASINN PÁFI Páfi hefur
verið mikið lasinn undanfarið og inn og út
af spítala. Myndir: AP
4.3.2005 Páfi og fjölmiðlarnir
Þrátt fyrir að við Íslendingar köstuðum
kaþólskunni fyrir hálfri fimmtu öld
síðan þá virðast málefni
páfa og Páfagarðs vera okkur enn áhugaefni
ef marka má umfjöllun fjölmiðla hér.
Rómarvefurinn gerði stikkprufu í byrjun mars
2005 á fréttavef Morgunblaðsins, Mbl.is, á
því hversu mikið hafi verið fjallað
um páfa á vefnum síðustu tvo mánuðina.
Leitarorðið var sem sagt „páfi“ og
tímabilið náði frá byrjun mars
aftur til janúarbyrjunar. Veikindi páfa hafa verið
mikið til umfjöllunar í fjölmiðlum
á þessum tíma og segir það nokkuð
um mikilvægi embættisins, jafnvel í augum
ókaþólskra. Hér
gefur að líta hluta þeirra frétta sem
birst hafa á Mbl.is á þessu tímabili.
Það er langtum styttra síðan við sögðum
skilið við dönsku krúnuna, en mér
er til efs að íslenskir fjölmiðlar flyttu
fréttir oft á dag um líðan drottningar
ef hún gerðist illa veik.
PÁFI MEÐ HÚMOR
Páfi reyndi fyrir stuttu að sleppa hvítum
friðardúfum út um glugga skrifstofu
sinnar í Páfagarði að viðstöddum
þúsundum manna á Péturstorgi.
En það var kalt úti og dúfurnar
vildu inn aftur í stofuhitann sem þær
og gerðu. Myndir: AP
11.2.2005 Síðustu dagar Karols?
Páfi hefur verið mikið lasinn undanfarna viku
en er nú kominn heim í Páfagarð af
sjúkrahúsinu og er sagður allur vera að
braggast. Jóhannes Páll hefur setið óvenju
lengi á pétursstóli, eða í heil
26 ár. Aðeins Píus IX. hefur setið lengur,
árin 1846-78 eða 31 ár, og svo sjálfur
postulinn Pétur árin 30-64/7 (dánarár
hans ekki nákvæmlega vitað).
En, nú er sagt styttast heldur í ævi páfa
og valdatíð og vildi einn franskur læknir meina
að, samkvæmt þeim gögnum sem gefin voru
upp um krankleika páfa, að hann ætti ekki nema
örfá daga eftir ólifaða. Hvort sem páfi
deyr núna eða seinna eru kardinálar farnir
að svipast um eftir næsta umboðsmanni Guðs
hér á jörð. Eru og sumir á því
að setja aldurstakmark á embætti páfa,
þ.e. að næstu páfar þurfi að
segja af sér nái þeir tilteknum aldri. Þessi
regla gæti hins vegar dregið úr áhrifum
og valdi páfa, en á hinn boginn gert efstu ár
fráfarandi páfa bærilegri í því
að þurfa ekki að burðast með ofurþungar
skyldur og ábyrgð embættisins alla leið
í gröfina.
7.2.2005 Enn bætist í Rómarvefinn
Mikið af góðu efni hefur bæst í
Rómarvefinn það sem af er nýja árinu
til viðbótar því sem kom inn á
síðari hluta ársins liðna. Mest af nýja
efninu er eftir nýja höfunda hjá vefnum,
en sjálfur hefur ritstjórinn bætti við
einu og öðru. Í sögukafla vefjarins hefur
bæst við fróðleg ritgerð um annað
púnverska stríðið sem háð
var á Ítalíu og í Karþagó
á árunum 218-201 f. Kr. Líka hefur bæst
við kjarnyrt yfirlit um
sögu Rómaborgar frá fornöld til
nútíma. Í handbókarkafla hefur bæst
við ein síða sem hefur yfirskriftina Fylgt
úr hlaði, gamalt efni úr fórum
ritstjóra sem átti fyrir löngu að fara
inn á vefinn. Einnig hefur bæst við síða
sem nefnir tíu
atriði sem Rómargestir ættu helst ekki
að sleppa að gera í borginni. Fleira mætti
telja ef ritstjóri mindi eftir því.
1.2.2005 Rómverjinn Robertino
Það var gaman að sjá loksins viðtal
við miðaldra barnastjörnuna Robertino í
Kastljósi gærkvöldsins - og það
sem enn betra var: viðtalið fór fram á
ítölsku. (Loksins segi ég, því
ég býst við að viðtalið hafið
verið tekið þegar hann hélt tónleika
hér á landi í desember á síðasta
ári).
Það var Eyrún Magnúsdóttir, nýjasti
liðsmaður Kastljóssins, sem spjallaði við
söngfuglinn. Eftirtektarvert var hversu skýrmæltur
hann er á ítölskuna, svona af Rómverja
að vera. Robertino heitir fullu nafni Roberto Loreti, fæddur
og uppalinn í Róm og býr þar víst
enn. „Robertino“ merkir Róbert litli, en ino-endingin
er s.k. smækkunarending í ítölsku.
Miðað við vaxtarlag söngvarans núna
er nafngiftin eiginlega orðin að öfugmæli,
rétt eins og með nafn Gauja litla. Sjónvarpskonan
Eyrún á áhugaverða grein hér
í Rómarvefnum um stöðu kvenna í
stjórnum ítalskra fyrirtækja.
5. janúar 2005 Gleðilegt nýár!
Nýtt ár er gengið í garð, alltaf
hækkar talan aftan við tölustafinn 2 og núllin
tvö. Og Rómarvefurinn er hálfnaður með
sitt fjórða starfsár. Vefurinn tók
töluverðum breytingum á liðnu ári.
Mikið efni hefur bæst við vefinn sem heldur ritstjóra
vel við starf sitt að setja fram efni vefjarins á
skipulegan og læsilegan hátt. Sumarið notaði
vefstjóri til að flikka örlítið upp
á útlit vefjarins og einfalda skipulag. Rómarvefurinn
er fyrst og fremst lesvefur, handbók á vefnum
um listir og menningu Ítalíu.
Við áramót er litið fram og aftur, en
líka tíðum hugsað um uppruna og þróun
tímatals okkar. Það er að sjálfsögðu
komið frá Rómverjum eins og svo margt annað
í vestrænni menningu.
6. janúar, þrettándinn, er dagur epifaníunnar,
dagsins þegar vitringarnir austrænu finna Jesubarnið
og færa því dýrustu gjafir sem þá
var að gefa; gull, reykelsi og mirru. Epifanía merkir
opinberun sem varð með tímanum að norn einni
á ítalíu sem kallast Befana.
Rómarvefurinn óskar netverjum farsældar
á nýju ári og þakkar öllum innlitið
á árinu sem var að kveðja. Þeim
fjölmörgu sem hafa sent vefnum línu er einnig
þakkað og sérstaklega þeim sem lögðu
Rómarvefnum efni til birtingar.
28. desember 2004 Ljósin upp
Jólin eru hátíð ljóss og friðar
meðal kristinna. Jólin eru hins vegar aldagömul
hátíð sem haldin hefur verið á
þeim tíma á norðurhveli jarðar þegar
þau hvörf verða að dagurinn hættir
að styttast og fer þess í stað að lengjast.
Þetta er sannarlega tími ljóssins; vonarinnar
um meira ljós og hlýju, en ekki alltaf friðarins.
Hér á landi er þetta oft tími slæmra
veðra, þótt oftar geri verri veður í
byrjun árs og um Þorrann. Þetta er tími
flóða. Bókaflóðið er sem gott
andlegt ljósmeti sem lýsir upp stystu daga ársins,
en skelfileg eru ofanflóð eins og þau sem urðu
í Neskaupstað rétt fyrir jólin fyrir
30 árum síðan.
Annan dag jóla fyrir ári síðan varð
mikill landskjálfti í Íran sem banaði
um þremur tugum þúsunda mannna. Sama dag
ári síðar, þessi jólin, leystist
svo úr læðingi ein mesta spenna sem hlaðist
hefur upp í jarðskorpunni síðan mælingar
hófust. Þetta gerðist við eyjuna Súmötru
við Indónesíu. Magnaði skjálftinn
upp mikla flóðbylgju á hafi úti sem
síðan barst til allra landanna við Indlandshaf
og olli stórkostlegum spjöllum og gríðarlegu
manntjóni sem ekki sér fyrir endann á þegar
þetta er skrifað.
Þenna dag árið 1908 varð versti jarðskjálfti
í sögu Evrópu í Messínusundi
mitt á milli Ítalíuskaga og Sikileyjar.
Skjálftinn lagði í rústir borgirnar
Messínu á Sikiley og Reggió syðst í
Kalabríuhéraði. Talið er að 70-100
þúsund manns hafi farist í skjálftanum
og flóðbylgjunum í kjölfarið.
12. desember 2004 Mafían, loksins, loksins
Mafían á Ítalíu er svo samtvinnuð
efnahags,- menningar- og stjórnmálasögu landins
að ekki verður um þetta fjallað án
þess að gera sér í einhverju grein fyrir
starfsemi hennar, uppruna og sögu og stöðu í
nútíma ítölsku samélagi.
Rómarvefurinn hefur lengi ætlað sér
að gera mafíunni skil hér í vefnum
en ekki komið því við. Italia é
un grande soggetto. Það er af svo miklu að taka
þegar menning og saga Ítalíu er annars vegar
og úr svo mörgu að velja. En, þegar ritstjóri
heyrði sinn eftirlætis fréttaritara og íslenskumælanda
flytja mafíupistla í útvarpi allra landsmanna
fannst honum að hér væri búið að
tilreiða efni sem hentaði Rómarvefnum og stefnu
hans að setja og safna saman efni um allt hvað varðar
Ítalíu.
Rómarvefurinn hafði samband við madrí(d)galann
Kristin R. Ólafsson og falaðist eftir mafíuefni
hans. Frá því er skemmst að segja að
fréttaritarinn ómþýði lét
efnið af hendi með ánægju og er því
fyrir hans tillegg hér til birtingar á Rómarvefnum.
27. október 2004 Meistari Mikjáll og list hans 1499, Róm síðla þess árs.
Listmálarinn og myndhöggvarinn Michelangelo Buonarotti
er 24 vetra og við það að ljúka við
Píetu sína. Höggmyndin er gerð í
marmara og sýnir Maríu halda á í
kjöltu sinni andvana syni sínum nýteknum
af krossinum.
RÚV sýndi fyrri þáttinn af
tveimur um meistarann Michelangelo miðvikud. 27. október
og lofar sá góðu um þann næsta
(3. nóv.). Þessir heimildarþættir koma
frá BBC og í þeim fyrsta var mest fjallað
um Englamikjáls fyrsta capolavoro, Pietá.
Michelangelo lifði í nær 90 ár
og þó að hann hafi á lífsferli
sínum gætt hverja höggmyndina eftir aðra
óviðjafnanlegri fegurð og mætti, eru margir
listgagnrýnendur á þeirri skoðun að
hann hafi aldrei skapað neitt svo fullkomið, fagurt
eða áhrifaríkt. Sagan að baki listaverksins
er mjög merkileg.
12. október 2004 Af eldfjöllum sunnan og austan
Rómversku borgirnar Pompei og Herculaneum
stóðu í miklum blóma árið
79 eftir Krist, þegar eldfjallið Vesúvíus
tók skyndilega upp á því að vakna
af aldalöngum dvala á hádegi 24. ágúst.
Fjallstindurinn sprakk án fyrirvara og upp úr
iðrum jarðar þeyttust ósköpin ölll
af ösku og eimyrju. Vegna þess að vindurinn var
vestlægur slapp Herculaneum í bili en spýjan
úr fjallinu helltist yfir Pompei.
Haraldur Sigurðsson, sérfræðingur í
Vesúvíusi, var nýverið í viðtali
í Kastljósi RÚV þar sem hann ræddi
um glænýjar og spennandi uppgötvanir austur
í Malasíu.
18. ágúst 2004 2 : 0
ÍSLAND - ÍTALÍA
Sá fáheyrði atburður átti sér
stað í dag í suðrænni veðurblíðu
í gömlu úthverfi Reykjavíkur að
íslenska karlalandsliðið í knattspyrnu
lagði landslið Ítalíu að (Laugardals)
velli með tveimur mörkum gegn engu - bæði
mörkin skoruð í fyrri hálfleik og ekki
þrjár mínútur á milli markanna:
Fiore mátti muna fífil sinn fegurri og Buffon
varð að hálfgerðu buffone þarna á
milli stanganna.
Rómarvefnum er fullljóst að fótbolti
er ær og kýr Ítala og að okkar ær
og kýr eru einmitt þær sömu skepnur:
ósigurinn þeim mun biturri. Því vottar
Rómarvefurinn ítölsku þjóðinni
samúð sína og lofar að þetta komi
aldrei fyrir aftur. Aldrei.
26. júlí 2004 Ítalskt ástand
Eyrún Magnúsdóttir
blaðamaður á Morgunblaðinu skrifaði athglisverða
grein í viðskiptakálf blaðsins 22. júlí
2004. Þar gerir hún stöðu kvenna í
stjórnum íslenskra stórfyrirtækja
að umtalsefni og segir hana ekki hótinu skárri
en hjá stöllum þeirra á Ítalíu,
að hér á landi ríki n.k. „ítalskt
ástand“. Er greinin öðrum þræði
áhugaverð greining á stöðu ítalskra
kvenna á vinnumarkaði og því hér birt í Rómarvefnum.
Lestu hér um stöðu eða stöðuleysi kvenna á Ítalíu og Íslandi í stjórnum stærri fyrirtækja.
19. júlí 2004 Nýtt í Rómarvefnum Vefstjóri Rómarvefjarins hefur notað sumarið í að uppfæra og endurnýja vefinn, enda sumarið ágætur tími til þess arna; fólk á faraldsfæti og netnotkun minni en yfir veturinn. Beytingarnar á vefnum standa enn yfir og munu að líkindum vara fram á haustið þegar gangskör verður gerð að því að kynna Rómarvefinn rækilega í fjölmiðlum.
En, það er ekki bara verið að breyta útliti vefjarins heldur dettur líka af og til inn nýtt efni. Að þessu sinni er það söguás helstu atburða á Ítalíu á 20. öldinni sem vefstjóri vonar að verði gestum Rómarvefjarins til glöggvunar og skilnings á sögu lands og þjóðar.
LA TOSCA María Callas í hlutverki Toscu í einni alvinsælustu uppfærslu óperunnar undir stjórn Victors de Sabata.
1. júlí 2004 Tosca í Óperunni 2005 Tosca eftir Puccini verður sett upp í Íslensku Óperunni snemma á næsta ári. Frumsýnt verður 11. febrúar. Leikstjóri verður Jamie Hayes og hljómsveitarstjóri er Kurt Kopecky. Þórunn María Jónsdóttir hannar búninga, Will Bowen leikmynd og Björn Bergsteinn Guðmundsson lýsingu. Elín Ósk Óskarsdóttir mun syngja titilhlutverkið, Toscu. Hlutverk Cavaradossi verður í höndum Jóhanns Friðgeirs Valdimarssonar og Ólafur Kjartan Sigurðarson fer með hlutverk Scarpia. Bergþór Pálsson syngur hlutverk Cesare Angelotti, Davíð Ólafsson er kirkjuvörðurinn og Snorri Wium fer með hlutverk Spoletta.
20. júní 2004 Rómarvefurinn endurbættur Nú eru þrjú ár síðan Rómarvefurinn fór í loftið. Vefurinn hefur tekið miklum breytingum á þessum tíma eins og vænta má og nú stendur yfir enn ein uppfærslan á útliti og efni hans. Að þessu sinni eru útlitsbreytingarnar ekki stórkostlegar, heldur markmiðið að einfalda vefinn í útliti og notkun og reyna enn að gera efni hans sem aðgengilegast.
Rómarvefurinn vonar að gestir hans sýni breytingunum þolinmæði meðan á þeim stendur og hvetur ykkur jafnframt til að láta í ykkur heyra hvað varðar efni og útlit vefjarins - eða ef þið viljið sjálf koma efni í vefinn.
1. mars 2004 Leonardó á skjánum Mánudagskvöldin 1. og 8. mars verður sýnd leikin bresk heimildarmynd í tveimur hlutum um ítalska endurreisnarmálarann og uppfinningamanninn Leonardo Da Vinci sem trúlega er þekktastur fyrir að hafa málað myndina frægu af Mónu Lísu. Í fyrri hlutanum er Leonardo fylgt eftir frá því að hann fæðist óskilgetinn í þorpinu Vinci í Toskaníuhéraði árið 1452 þangað til meistaraverk hans Síðasta kvöldmáltíðin er afhjúpað í Mílanó 45 árum síðar.
Leonardo lærði til verka í innsta hring endurreisnarhreyfingarinnar í Flórens. Þar slapp hann naumlega við að vera handtekinn og hugsanlega brenndur á báli og komst innundir hjá hinum valdamikla harðstjóra Ludivico Sforza, hertoga af Mílanó. Á meðan Leonardo var í þjónustu Sforza málaði hann meðal annars fræga madonnumynd sína, komst að því af hverju himininn er blár og varð fyrstur manna til að kryfja mannslíkama með nákvæmum hætti. Og Leonardo var líka verkfræðingur góður. Í myndinni er smíðaður og prófaður brynvagn til notkunar í stríði og eins fallhlíf gerð eftir teikningum meistarans. (Kynning frá Ruv.is)
2. febrúar 2004 Hrútspungar og lýtaaðgerðir Um það bil sem mörlandinn er við það að kyngja síðasta jólabitanum tekur Þorrinn við og hákarlsbitarnir elta hangiketið niður í maga þar sem þau hitta fyrir jólaölið og ... splass, brennivínið kemur brunandi á eftir. Um það bil sem hrútspungar og kindakjálkar eru á hvers manns diski fregnast það sunnan úr Ítalíu að forsætisráðherrann þar sé að öllum líkindum nýkominn úr lýtaaðgerð - eða fegrunaraðgerð, ef við gefum okkur að hann hafi nú ekki verið neitt sérlega ljótur fyrir - að hann Berlusconi hafi látið laga sig til kringum augun.
Óvenju hljótt var um forsætisráðherrann í byrjun nýs árs - jafnvel áður en hann hafði ástæðu til að flýja úrskurð stjórnlagadómstóls landsins um kolólögleg lög löggjafans honum til handa um þinghelgi þarna á hinu árinu. Þá fóru fjölmiðlar að velta því fyrir sér hvar maðurinn væri.
Ekkert heyrðist lengi í forsætisráðherra, en „lýtalæknirinn“ kunni ekki við lítillætið og tjáði með ítölsku stolti hverjum sem heyra vildi að auðvitað þyrfti pólitíkus eins og Silvíó að hugsa um útlitið og að sjálfsögðu hefði maðurinn valið þann hæfasta í faginu til að annast þá lyftingu. Næsta í málinu var að Berlusconi játaði að hann hefði farið í n.k. þjónustuskoðun, svona eins og hver annar Fíat og Ferrari. Að lokum hefur forsætisráðherrann játað að hafa látið lagfæra augnalokin lítillega og segist tilbúinn að miðla númeri læknisins til þeirra þurfi á slíkri þjónustu að halda.
27. janúar 2004 Við erum orðin eins og Rómverjar
- skrifar Gunnar Smári Egilsson, ritstjóri Fréttablaðsins 27. janúar 2004.
„Ég hef reynt að koma mér upp kenningu um menningarlegt ástand nútímans. Hún er svona: Við erum að yfirgefa ástand sem minnir um margt á Grikkland til forna og yfir á plan sem er líkara Rómaveldi. Þrátt fyrir að Grikkrnir hafi stofnað til Ólympíuleikanna og verið sportistar góðir voru þeir líklega áhugasamari listunnendur en íþróttabullur. Leiklistarhátíðir þeirra voru hápunktar menningarlífsins og þeir reyndu að gæða íþróttaleika sína listrænum þokka - til dæmis með því að láta þátttakendur keppa nakta.
Rómverjar voru hins vegar listasnobbarar fremur en listunnendur. Þeir notuðu listirnar til að hefja sig yfir barbarískan bakgrunn sinn og átu inntak þeirra að mestu hrátt eftir Grikkjunum. Þótt þeir hafi fyrirlitið Grikkina fyrir moðkennda hugsun og deigan kjark öfunduðu þeir þá af auðugum anda og flottum stíl. Þeir höfðu hins vegar ekkert til Grikkjanna að sækja þegar kom að íþróttum. Þeir nenntu ekki að horfa á íturvaxna menn kasta kringlu. Rómverjar vildu alvöru átök á leikvöngum sínum - og alls engan Ólympíuanda.“
Niðurstaða ritstjórans, eða kenning hans öllu heldur, er að hið s.k. raunveruleikasjónvarp nútímans og eftirmyndir þess séu hringleikar vorra tíma og SMS-dómarnir þumallinn upp eða niður. Púbblikkið ræður. Viva Roma!
22. janúar 2004 Þjóðarbaka Íslendinga „Hin ítalska flatbaka er orðinn þjóðarréttur Íslendinga, og hjónin frú ýsa og herra þorskur eru komin úr tísku." - segir Þráinn Bertelsson.
Til marks um það má nefna að íslenskar ungmeyjar borða aðeins um 15 grömm af fiski á dag, en það magn er ívið meira en upp í nös á ketti og heldur minna en einn munnbiti. Drengir á aldrinum 15-19 ára stefna í að verða miklir goskarlar því að þeir sötra heilan líta af sykruðu gosi á dag. Þannig tekst þeim að innbyrða 143 grömm af sykri, en það er svipað og einn íþróttaskór vegur.“
- Þráinn Bertelsson, Bakþankar, Fréttablaðið, 22. janúar 2004
Lestu um þjóðarbökuna flötu (pízzu) hér í Rómarvefnum.
Eldaðu
ítalskt !!!
Oft er það einfaldleikinn sem blívur
best og segja má að eitt af því
sem einkennir ítalska matargerð sé sparleg
notkun hráefnis og krydda.
Söguás:
1929
Mússolíní og Píus páfi
XI. semja um réttarstöðu Páfagarðs
sem sjálfstætt ríki innan ítalska
ríkisins með samningi sem kenndur er við
Lateran.
Hátíðir
Kjötkveðju-
hátíð er haldin í Róm
svo til allan febrúarmánuð og nær
hámarki á Martedí Grasso,
sprengidag þeirra Ítala. Karnivalið virðist
aðallega vera hátíð smáfólksins;
telpurnar klæða sig upp í prinsessukjóla
og strákarnir í ofurhetjubúninga.
Hver
er maðurinn?
Silvio Berlusconi fv. forsætis-
ráðherra Ítalíu hóf ferilinn
sem dægurlaga-söngvari á ferjum, en
tók síðan að stunda viðskipti
og sá sér þá hag í að
stofna til vinfengis við stjórnmálamenn.
Feneyjar
Feneyjar eru reistar á mörgum hólmum
og helsti ferðamáti íbúa innan
borgarinnar hefur frá upphafi verið siglingar.
Upphaf
klaustur-
lífs
Það féll í hlut Benedikts frá
Núrsíu að stofna fyrstu munka-
regluna og ber hún nafn hans. Benedikt kom klaustri
á laggirnar á Monte Cassino á Suður-Ítalíu.
Kaþólsk
trú og lútersk
Ef kaþólskur maður bergir brauðið
við altarisgöngu verður brauðið að
holdi Krists í munni honum vegna þess að
presturinn framkvæmir athöfnina fyrir hönd
kirkjunnar.
Leonardo
Leonardo da Vinci er talinn einn mesti listamaður
sögunnar. Hann fæddist í smábænum
Vinci á Ítalíu um miðja 15. öldina
og hefur æ síðan verið við þann
bæ kenndur.
ÁBÓTINN
SAGÐI ...
„Rómaborg er
yfir öllum borgum, og hjá henni eru allar borgir
að virða sem þorp, því að jörð
og steinar og stræti öll eru roðin
í blóði heilagra manna“.
1499, Róm síðla þess árs.
Listmálarinn og myndhöggvarinn Michelangelo Buonarotti
er 24 vetra og við það að ljúka við
Píetu sína. Höggmyndin er gerð í
marmara og sýnir Maríu halda á í
kjöltu sinni andvana syni sínum nýteknum
af krossinum.
Rómversku borgirnar Pompei og Herculaneum
stóðu í miklum blóma árið
79 eftir Krist, þegar eldfjallið Vesúvíus
tók skyndilega upp á því að vakna
af aldalöngum dvala á hádegi 24. ágúst.
27. janúar 2004
MMX Saga /
Kirkja /
Listir /
Matur
/ Tenglar