...Úúútsýni!

Það er ekki frá því að maður geti fengið snert af innilokunarkennd eftir nokkra dvöl í bænum án þess að hafa ratað upp á einhverja hæðina til nauðsynlegrar yfirsýnar. En þá er stutt upp á næstu hæð til úrvals útsýnar.

Helstu útsýn er að hafa frá Janikúlum, Monte Mario, Avantínhæð (hjá kirkju Söntu Sabínu) og frá Pinciogarðinum fyrir ofan Popolotorg. Maríófjall er hæsta hæðin í borginni og þar er starfrækt stjörnuskoðunarstöð. Þaðan er gott útsýni suður yfir alla borgina, hægt að fá sér kaffi á bar eða snæða á fínum veitingastað. Auðvelt er að taka leið 913 frá Ágústusartorgi (Piazza Augusto Imperatore) niðri í bæ.

Frábært útsýni er að hafa ofan úr hjálmi Péturskirkjunnar, nema að lækning við innilokunarkenndinni kann að vera dýru verði keypt vegna langra ganga og þröngra upp, upp ... En gangan er nú ekki svo mikil og útsýnið fullkomlega þess virði. Þeir sem ekki treysta sér, geta hins vega látið sér nægja að fara upp á þakið, sem er áfangi á leiðinni upp á hvolfþakið. Þar eru salerni, minjagripaverslun, símar og póstkassar ... og útsýn all góð.