Þurrkað pasta
Þurrkun á pasta var og er enn afar mikilvægur þáttur góðrar framleiðslu. Þurrkunin varð lengst framan af að eiga sér stað undir berum himni og því voru viss svæði mun heppilegri en önnur. Fyrsti vélknúni þurrkarinn var framleiddur í kringum1875 og eftir það var framþróunin hröð, en ávallt var þó líkt eftir hinni náttúrulegu fornu aðferð. Snemma á 20. öld verða síðan hin stóru stökk vélvæðingar og tækniþekkingar og smám saman eru allir þættir pastaframleiðslunnar orðnir vélvæddir. Eftir síðari heimsstyrjöld naut svo framleiðslan góðs af enn frekari tæknibyltingu, eins og margt annað, sem skilaði sér fljótlega í enn fleiri neytendum um allan heim.

Matreiðslan
Á 14.öld virðist matreiðsla á pasta fremur einföld; það er soðið og sigtað en síðan eru ýmis krydd og jafnvel smjör sett út á en oft einnig Parmaostur. Á föstunni var pastað gjarnan soðið í mjólk og síðan bragðbætt með kryddi og sykri. Í matreiðslubók frá þessum tíma kemur fram að sykri og kryddi sé stráð yfir soðna pastavafninga, sem fylltir eru muldum valhnetum. Í einni uppskrift er ráðlagt að nota tréprjóna til að auðvelda það að snæða pasta.

Suðan
Suðutími pöstunnar fyrr á öldum vekur athygli, en í einni gamalli bók er mælt með einni klukkustund fyrir rómverska pastarétti og tveimur fyrir sikileyska. Þarna ræður að sjálfsögðu að pasta þessa tíma var talsvert þykkara en það sem nú tíðkast og einnig er sérstaklega tekið fram að hið sikileyska hafi verið lagað úr durum hveiti.

Mikilvægt er að sjóða pasta í miklu vatni og salta vel. Er það vegna sterkjunnar sem skilst frá hveitinu við suðu og veldur því að pösturnar límast saman. Sem sagt, minni sterkja, minni líming.

Það leið raunar langur tími þar til hinn nú svo dæmigerði ítalski réttur leit dagsins ljós, pasta með tómatmauki.

Ofnbakað pasta
Elsta heimildin sem greinir frá ofnbökuðu pasta er í matreiðslubók frá 1570. Þar er soðið pasta sett á fat og yfir stráð osti, sykri, kanel og smjöri en síðan er sett lok á fatið og rétturinn hitaður í ofni.

Pasta + tómatmauk = sönn ást
Langur tími leið þar til hinn nú svo dæmigerði ítalski réttur leit dagsins ljós, pasta með tómatmauki. Í matreiðslubók nágrannans góða, hertogans af Buonvicino, sem kom út í Napolí 1839, er uppskrift að rétti sem nefnist Vermicelli con lo pomodoro, en þar skal sjóða pastað al dente og blanda síðan tómatmauki saman við.

Hversu holt er pasta?
Rannsóknir, sem gerðar voru í Bandaríkjunum á hollustu ýmissa fæðutegunda, sýndu fram á að hið dæmigerða fæði Miðjarðarhafsþjóða - og þar með talið pasta - hefði mikið næringargildi og væri síst fitandi (miðað við hefðbundna fæðusamsetningu Ítala, nota bene).

Eru pöstur og pízzur fitandi? - sjá á Netdoctor.is
Hvernig er best að sjóða pasta?