| | RÓMVERSK-KAÞÓLSKA KIRKJAN | |
| Páfakjör |
| | Miklar og strangar siðareglur fylgja vali á nýjum páfa,
en þeim er m.a. ætlað að tryggja það að ekki komi upp
klofningur innan kaþólsku kirkjunnar. | |
 | | LOK OG LÆS Bronshurðin mikla í Páfagarði er höfð fyrir dyrum frá því að páfi deyr og þar til annar páfi hefur verið valinn. Mynd: AP | Í kaþólskum sið er litið svo á að páfi sé beinn arftaki Péturs postula sem leiðtogi kristinna manna hér á jörð. Miklar og strangar siðareglur fylgja vali á nýjum páfa, en þeim er m.a. ætlað að tryggja það að ekki komi upp klofningur innan kaþólsku kirkjunnar.
Tveimur vikum eftir andlát páfa loka kardínálar Páfagarðs sig inni í herbergi í Sixtínsku kapellunni til að velja næsta páfa, en tæplega 120 kardinálar eru gjaldgengir til embættisins.
Kardinálarnir munu kjósa á milli þeirra eftir miklum kúnstarinnar reglum þar til þeir hafa komist að niðurstöðu. Þeir geta kosið allt að fjórum sinnum á dag í leynilegum kosningum en takist þeim ekki að komast að niðurstöðu á fyrstu þremur dögunum taka þeir sér einn dag til bæna. Síðan munu þeir kjósa sjö sinnum áður en þeir taka sér annan bænadag.
Stefnt er að því að páfi sé kosinn með tveimur þriðju hlutum atkvæða en takist það ekki á tólf dögum geta kardinálarnir kosið páfa með hreinum meirihluta.
| PÁFAKJÖR - NOKKRIR PUNKTAR | - Samkvæmt stjórnarskrá Páfagarðs, Universi Domenici Gregis, sem sett var 1996, og samin í umsjá Jóhannes Páls II sjálfs, fer útför páfa fram fjórum til sex dögum eftir lát hans. Útförin er síðan upphaf níu daga sorgartíðar kaþólskra manna, Novendial.
- Næsti páfi verður 265. páfi sögunnar (andpáfar meðtaldir), en sá fyrsti er talinn vera Pétur postuli sem dó í Róm árið 64 eða 67.
- Kjör nýs páfa skal fara fram í Sixtínsku kapellunni fimmtán dögum eftir lát páfa. Áttræðir kardínálar og eldri eru hvorki kjörgengir né hafa kosningarrétt á samkomunni sem velur páfa.
- Það eru um 117 kardínálar sem loka sig inni í Sixtínsku kapellunni í Páfagarði til að kjósa nýjan páfa.
- Stefnt er að því að páfi sé kosinn með tveimur þriðju hlutum atkvæða, en takist það ekki á tólf dögum geta kardinálarnir kosið páfa með hreinum meirihluta.
- Eina vísbendingin sem umheimurinn hefur um gang mála er reykur upp úr reykháfi kapellunnar af brenndum kjörseðlum. Margoft er kosið til að knýja fram því sem næst einróma kjör; svartur reykur táknar að engin niðurstaða sé fengin, hvítur hins vegar að nýr páfi sé fundinn.
|
Kardinálarnir eru lokaðir inni á meðan á þessu ferli stendur og eru dyr og gluggar innsiglaðir. Þá verða bæði þeir og allir þeir sem þjóna þeim á þessum tíma að sverja þagnareið en rof á honum varðar útskúfun úr samfélagi kristinna manna.
Kjörseðlarnir eru brenndir í gömlu eldstæði eftir hverja talningu og er reykurinn, sem stígur upp um reykháfinn, eina vísbendingin sem umheimurinn hefur um gang mála. Þá er hefð fyrir því að strá séu brennd með miðunum á meðan óvíst er hver útkoman verður en stráin gera reykinn svartan. Þegar niðurstaða liggur fyrir eru miðarnir hins vegar brenndir án stráanna og þannig flytur ljós reykurinn umheiminum fyrstu fréttirnar af því að vali á nýjum páfa sé lokið.
Heimild: Mbl.is, 2. apríl 2005.
Ítarefni: Skoðaðu lista yfir páfa sögunnar á vef kaþólsku kirkjunnar á Íslandi.
 Lestu líka um embætti páfa og Páfagarð hér í Rómarvefnum. |
