| | RÓMVERSK-KAÞÓLSKA KIRKJAN | |
| Verndardýrlingur netsins |
| | Ísidór hafði feikileg áhrif á menntalíf og menningu
sinnar samtíðar. Hann væri því vel að því kominn
að verða verndardýrlingur netsins. | |
Eftir Þórð Víking Friðgeirsson
 Í katólskum kirkjusið eru valdir sérstakir verndardýrlingar ákveðinna sviða, mála og jafnvel atvinnugreina. Verndararnir eru valdir vegna sérstakra hæfileika sem þeir hafa búið yfir í lifanda lífi eða þá að atburðir í lífi þeirra hafa gert þá verðuga til að vaka yfir hagsmunum skjólstæðinga sinna.
Til dæmis þá er heilagur Frans frá Assisi verndari náttúrufræðinga því hann unni náttúrunni öðrum mönnun fremur. Francis de Salis var rithöfundur og er því verndadýrlingur rithöfunda og blaðamanna. Klara frá Assisi er verndari sjónvarpsins því eitt sinn þegar hún komst ekki til messu vegna veikinda þá sá hún samt og heyrði hvert orð – þótt messan væri haldin langt í burtu. Verndari kaupsýslumanna heitir því skondna nafni Homobonus. Homobonus var lærður í viðskiptum og einstaklega grandvar fésýslumaður. Konur í viðskiptum eiga sinn verndadýrling sem er Margrét frá Clitherow. Hvort sem það eru meðmæli eða merki þess að stéttin þurfi óvenju mikillar verndar og tilsjónar með þá eiga verkfræðingar a.m.k. fimm verndadýrlinga. Þar má geta heilags Benedikts, heilagrar Barböru og Ferdinands III. Svo mætti áfram telja. Yfirleitt útnefnir páfinn verndardýrlinginn, en einnig geta hópar valið sér verndara.
Nú stendur yfir val á verndara Netsins og stendur valið milli þriggja dýrlinga. Fyrstan ber að nefna þann spánska San Pedro Regalado, en hann er útnefndur vegna þess að fjarlægðir skiptu hann engu máli. Til dæmis þá gat hann verið á fleiri en einum stað í einu rétt eins og internetið. Þá skal getið heilagrar Teklu, en hún getur hjálpað fólki sem þjáist af tölvuhræðslu. Sá sem er langlíklegast að Vatíkanið velji sem verndardýrling Netsins er þó hvorugur þessara heldur heilagur Ísidór frá Sevilju á Spáni.
Heilagur Ísidór
Heilagur Ísidór fæddist líklega árið 560 og lést árið 636. Þegar hann spratt úr grasi varð hann einstaklega fjölfróður maður. Tungumál, læknisfræði, heimspeki, lögfræði og margt fleira lék í höndum Ísidórs. Fullorðinn var hann talinn lærðasti maður sinnar samtíðar. Höfuðverk hans nefnist "Etymologiae" sem er þess tíma alfræðibók í 20 bindum - sú fyrsta sinnar tegundar sem kristinn maður gefur út. Alfræðibók er vitanlega ekkert annað en gagnagrunnur og internetið er sömuleiðis í raun einn ógnarstór gagnagrunnur. Ísidór hafði feikileg áhrif á menntalíf og menningu sinnar samtíðar. Hann væri því vel að því kominn að verða verndardýrlingur Netsins.
Netið, páfinn og góðar vættir
Þess skal getið að katólska kirkjan er vel virk í að nota internetið til að boða orðið. Messum páfans er t.d. útvarpað á Netinu og Vatikanið rekur voldugt og íburðarmikið vefsetur á www.vatican.va. Ekki duga færri en þrír vefþjónar til að anna umferðinni á páfavefnum. Líklega hafa vefþjónarnir ekki verið skírðir en þeir hafa fengið nöfn og heita eins og við á - Rafael, Mikael og Gabríel.
Þess skal getið til gamans að auk fjögurra vætta þá á Ísland tvo dýrlinga. Annar er heilagur Anskar (801-854). Anskar þessi lét mjög til sín taka í Skandinavíu og kristnaði fjölda manna. Þá var hann biskup í Brimarborg og vann margt góðverkið t.d. að draga mjög úr hinni ógeðfelldu þrælaverslun víkinganna.
Hinn verndardýrlingur Íslands er sjálfur en Þorlákur Þórhallsson (1133-1193). Þorlákur helgi var m.a. biskup í Skálholti, stofnaði klaustur í Þykkvabænum, endurskipulagði kirkjuna og kom nauðsynlegum aga og festu á starfið s.s. með því að krefjast skírlífis kirkjunnar þjóna. Hann var tekinn í dýrlinga tölu árið 1198 á Alþingi, fimm árum eftir að hann lést. Páfadómur hefur að vísu ekki enn staðfest þann gjörning.
Heimild: 18.05.2002 http://www.stefni.is/
vefsidu/greinaskrif/greinar/isediore.htm
Ath. að ritstjóri hefur stytt greinina og breytt titli,
bætt inn millifyrirsögnum lagaði sumt í texta að málstefnu RV.
Myndina af Ísidóri fékkst á skrýtnum vef:
http://users.net1plus.com/artcatholic/ |
MMX Saga /
Kirkja /
Listir /
Matur
/ Tenglar