| |
| Skjálfti við Messínusund |
| | Ítalir kalla Sikiley og Kalabríu „la terra ballerina“,
landið dansandi, vegna jarðskjálftanna sem eru
afar tíðir á þessum slóðum. Hér segir af mann-
skæðum sjálfta við Messínusund árið 1908. | |
Það var á milli jóla og nýárs, nánar tiltekið 28. desember, árið 1908 að versti jarðskjálfti í sögu Evrópu átti sér stað í Messínusundi mitt á milli Ítalíuskaga og Sikileyjar.
Jarðskjálftinn lagði í rústir borgirnar Messínu á Sikiley og Reggió syðst í Kalabríuhéraði. Talið er að 70-100 þúsund manns hafi farist í skjálftanum og flóðbylgjunum í kjölfarið. Ítalir kalla Sikiley og Kalabríu „la terra ballerina“, landið dansandi, vegna jarðskjálftanna sem eru afar tíðir á þessum slóðum. Árið 1693 fórust 60 þúsund manns í jarðskjálfta á Sikiley og tæpri öld síðar fórust 50 þúsund í Kalabríu af sömu völdum.
Skjálftinn í og við Messínusund árið 1908 er talinn hafa verið 7,2 á Richterkvarða. Hann varð kl. 5.20 að morgni, þegar fólk var í fastasvefni og því mannskæðari en ella. Skjálftinn átti upptök undir hafsbotninum og orsakaði gríðarlegar flóðbylgjur, meira en 10 metra háar. Um níu af hverjum 10 byggingum borganna Messína og Reggió eyðilögðust. Símalínur og vegir klipptust í sundur og torveldaði það björgunarstörf. Í kjölfar stærsta skjálftans fylgdu nokkrir minni eftirskjálftar og gerðu illt verra; fleiri byggingar hrundu og björgunarmenn fórust eða urðu fyrir skakkaföllum.
Stærsti jarðskjálfti í sögu Evrópu er hins vegar að líkindum skjálftinn sem reið yfir Lissabon árið 1755. Er sá skjálfti talinn hafa verið 8,7 á Richter og flóðbylgjan af hans völdum hafa orðið 75 þúsund manns að fjörtjóni.
Byggt á „Þetta gerðist“ í Fréttablaðinu, 28.12.2004.
 Lestu meira um náttúruhamfarir á Ítalíu í pistlinum um sprengigosið í Vesúvíusi árið 79 sem lagði m.a. borgina Pompei í rúst.
| Í FRÉTTUM VAR ÞETTA HELST ... | 7.11.2002
 ELDGOS Í ETNU
Stærsta og virkasta eldfjall álfunnar, Etna á norð-austurhluta Sikileyjar, gýs nú af fullum krafti og færist í aukana skv. síðstu fréttum. Etna bærir reglulega á sér, fimmta hvern mánuð segja fræðingarnir, en síðasta stóra gosið hennar var fyrir 10 árum. Engan hefur sakað og engar skemmdir hafa enn orðið á mannvirkjum, en öskufall töluvert. Stór hópur íslenskra ferðamenna var við rætur Etnu er hún byrjaði að ræskja sig á laugardagskvöldið sl. 26.10., og því grunar mann að eldfallið sikileyska sé að sýna sig fyrir gestum frá eldfjallaeyjunni köldu. - RV.
27.10.2002
Eldgos í Etnu
Gos hefur verið í eldfjallinu Etnu nærri Catania á Sikiley í dag. Etna er 3.310 metra há og lifnar við á um fimm mánaða fresti. Síðasta stóra gosið í Etnu var árið 1992. Jarðskjálftar hafa verið í fjallinu í morgun. Stærsti skjálftinn mældist 4,2 stig á Richter. Sérfræðingar segja að hvorki íbúum í nágrenninu né ferðamönnum sé hætta búin. - AP | |
