Ítalir heimsmeistarar í fótbolta í fjórða sinn Ítalir urðu heimsmeistarar í fótbolta í fjórða sinn þegar þeir unnu Frakka 5-3 í vítaspyrnukeppni eftir 1-1 jafntefli í framlengdum úrslitaleik á Ólympíuleikvangnum í Berlín að kvöldi 9. júlí sl.. Voru bæði mörkin í leiknum skoruð í fyrri hálfleik. Strax á sjöundu mínútu tók Zinedine Zidane forystu fyrir Frakka með marki úr vítaspyrnu sem dæmd var á Marco Materazzi varnarmann Ítalíu. Materazzi tókst síðan að jafna metin á nítjándu mínútu með skallamarki og þar við sat til loka framlengingar. Frakkar höfðu betur í síðari hálfleiknum og framlengingunni, en höfðu ekki erindi sem erfiði. Rétt fyrir lok framlengingarinnar lauk löngum og frækilegum ferli Zidans fyrirliða Frakka þegar hann var rekinn af velli fyrir að stanga Materazzi. Ítalir náðu ekki að færa sér liðsmuninn í nyt og því varð að knýja fram úrslit í vítaspyrnu og þar voru vinir vorir loksins rétt skóaðir.

SKYLDI HÚN HALDA? „Þetta er hópur sem endist allt kjörtímabilið,“ sagði Romano Prodi um nýju ríkisstjórnina. Mynd: AFP Prodi með nýja ríkisstjórn Romano Prodi hefur myndað nýja ríkisstjórn á Ítalíu. Tilviljun ein réði því að þennan sama dag, 17. maí, tíu árum áður myndaði hann sína fyrstu ríkisstjórn sem entist aðeins til ársins 1998 eða í um tvö ár. Prodi segir nýju stjórnina skipaða samhentum hópi manna sem séu staðráðnir í að láta stjórnina endast út allt kjörtímabilið. Prodi afhenti nýkjörnum forseta, Giorgio Napolitano, ráðherralista sinn í gær, daginn eftir að hann fékk stjórnarmyndunarumboð. Þar með lauk meira en mánaðarlöngu óstöðugleikatímabili í ítölskum stjórnvöldum, sem hófst í kjölfar þingkosninganna í síðasta mánuði. Prodi og flokkabandalag hans vann þar afar nauman sigur á Silvio Berlusconi, fyrrverandi forsætisráðherra, sem lengi vel neitaði þó að viðurkenna ósigur sinn. Að nýju stjórninni standa tveir stórir miðjuflokkar ásamt fjölskrúðugum hópi smærri flokka, allt frá kommúnistum til fyrrverandi kristilegra demókrata. Tveir fyrrverandi forsætisráðherrar eru í nýju ríkisstjórninni, þeir Massimo D'Alema, fyrrverandi kommúnisti sem verður utanríkisráðherra, og Giuliano Amato úr Sósíalistaflokknum, sem verður innanríkisráðherra og þar með yfirmaður lögreglu landins og leyniþjónustunnar. Náinn samstarfsmaður Prodis, Arturo Parisi, verður varnarmálaráðherra. Lestu um stjórnsýslu og stjórnarfar Ítalíu og fleiri fréttir af Ítalíu hér í Rómarvefnum.

17.05.2006 / Ruv.is
Prodi svarinn í embætti
Romano Prodi sór embættiseið og tók formlega við sem forsætisráðherra Ítalíu fyrr í dag. Við það tækifæri sagði hann mikilvægast að auka samstöðu þjóðarinnar, setja landinu markmið og sækja fram. Þá þyrfti að draga úr pólitískri spennu og þrætum.

Ný ríkisstjórn var einnig kynnt. Prodi sagði hana samheldna sveit, en ekki aðeins hóp einstaklinga. Tveir fyrrverandi forsætisráðherrar eru í stjórninni, Massimo D'Alema, sem verður utanríkisráðherra, og Guiliano Amato, sem verður innanríkisráðherra. Búist er við að þingið greiði atkvæði um traustsyfirlýsingu við nýju stjórnina í næstu viku.

16.5.2006 / Mbl.is
Prodi segir samsteypustjórnina standa traustum fótum
Romano Prodi, forsætisráðherra Ítalíu, hitti forseta Ítalíu í dag og fullvissaði hann um að samsteypustjórn hans standi traustum fótum og að hún hafi styrk til þess að stýra landinu. Prodi vonast til þess að fá umboð frá forsetanum til þess að mynda ríkisstjórn áður en að dagurinn er úti.
„Ég hef fullvissað forsetann að samsteypustjórnin sé traust,“ sagði Prodi og bætti því við að samsteypustjórn hans hafi „þann styrk og þann samloðunarkraft“ sem þörf er á til stjórnarmyndunar.

11.05.06 / Fréttablaðið
Forsetakjör á Ítalíu heppnaðist í fjórðu umferð
Giorgio Napolitano verður næsti forseti Ítalíu. Sameinað þing efri og neðri deildar, þar sem einnig sátu fulltrúar frá héraðsstjórnum, kaus forsetann í fjórðu umferð með 543 atkvæðum, sem er nokkru meira en sá 505 atkvæða meirihluti sem dugað hefði til að niðurstaða fengist.

Fyrri umferðirnar þrjár höfðu ekki skilað neinni niðurstöðu, enda þurfti þá tvo þriðju atkvæða. Bandalag vinstriflokkanna hefur nauman meirihluta á þinginu, þannig að hægrimenn gátu hæglega komið í veg fyrir að forsetaefni vinstrimanna næði sigri.

Napolitano er fyrrverandi kommúnisti, sá fyrsti úr þeirra röðum sem tekur við forsetatign á Ítalíu. Hann er áttræður og hefur átt sæti á þingi sem heiðursþingmaður til æviloka, einn af sjö manns sem njóta þess heiðurs. Napolitano nýtur víða virðingar, þykir bæði hógvær og réttsýnn. Hann átti þátt í að umbreyta Kommúnistaflokknum í vinstrisinnaðan demókrataflokk.

8.05.06 / Fréttablaðið
Forsetakjör á Ítalíu
Tvær meginfylkingar ítalskra stjórnmála deila nú hart um hver verði næsti forseti landsins. Nýkjörið þing landsins gengur til atkvæða í dag um það hver verður eftirmaður Carlos Azeglios Ciampis á forsetastólnum.

Romano Prodi og bandalag vinstriflokka unnu í þingkosningum í síðasta mánuði nauman meirihluta bæði í efri og neðri deild þingsins. Þeir hafa lagt til að næsti forseti verði Massimo D'alema, fyrrverandi forsætisráðherra og leiðtogi stærsta flokksins í fylkingu Prodis.

Hægriflokkarnir, undir forystu Silvios Berlusconis, vilja hins vegar að næsti forseti verði Gianni Letta, náinn samstarfsmaður Berlusconis. Í gær hélt Berlusconi því fram að DAlema væri ómögulegur í embættið og hótaði því að stjórnarandstaðan myndi láta öllum illum látum framvegis í umræðum á þingi ef vinstriflokkarnir keyra það í gegn að DAlema verði fyrir valinu.

Tillagan um stjórnmálamann frá vinstriflokki er hreinlega ósiðleg, sagði Berlusconi við fréttamenn í gær. Okkar frambjóðandi, frambjóðandi miðju- og hægriflokkanna, er Gianni Letta, og við krefjumst þess að atkvæðin falli honum í vil.

Forsetinn hefur meðal annars það hlutverk að veita umboð til stjórnarmyndunar. Ciampi, sem lætur af embætti nú í maí, hefur sagt að hann vilji að eftirmaður hans í embætti veiti stjórnarmyndunarumboð, þannig að Prodi, sem er með meirihluta í þinginu, þarf að bíða eftir nýjum forseta til að geta myndað ríkisstjórn.

Á Ítalíu er forseti kosinn af þingmönnum og héraðsstjórnarmönnum, samtals um þúsund manns. Aðrir stjórnmálamenn hafa einnig verið nefndir til sögunnar sem hugsanleg forsetaefni, þar á meðal Giuliano Amato, fyrrverandi forsætisráðherra, og Mario Monti, fyrrverandi framkvæmdastjóri hjá Evrópusambandinu. Til þess að flækja málin enn frekar hefur Norðurbandalagið, samstarfsflokkur Berlusconis, sagt að leiðtogi þess ætti að verða næsti forseti og mun greiða honum atkvæði sín.

06.05.2006 / Ruv.is
Lífvarðasveit páfa 500 ára
Um þessar mundir eru 500 ár liðin síðan sveit svissneskra lífvarða var sett á laggirnar í Páfagarði. Í messu sem var haldin lífvarðasveitinni til heiðurs í morgun, þakkaði Benedikt páfi henni dygga þjónustu.

Predikun páfa í morgun fór fram á þremur þjóðtungum Sviss, þýsku, frönsku og ítölsku. Messan var til heiðurs lífvarðasveit Páfa, sem hefur einungis verið skipuð Svisslendingum í 500 ár. Sveitin var stofnuð í janúar 1506 þegar 150 svissneskir málaliðar voru fengnir til að þjóna páfanum í Róm.

Þann 6. maí hvert ár eru nýir verðir teknir inn í sveitina, og messan í dag fór fram áður en 33 nýir lífverðir voru vígðir. Lífverðir páfa eru nú 110. Margir þeirra bera enn einkennisvopn sveitarinnar, bryntröll, sem er í senn öxi og spjót. Sumir þeirra bera þó einnig sjálfvirka riffla, sem ætla má að verði frekar gripið til ef hætta steðjar að páfanum. Páfi þakkaði í predikun sinni lífvörðunum dygga þjónustu og hugrekki þeirra. Hann bað þess að þeir yrðu áfram menn bænarinnar, og fyrir atbeina heilagrar visku sannir guðsmenn.

03.05.06 / Fréttablaðið
Berlusconi forsætisráðherra Ítalíu viðurkennir ósigur sinn og segir af sér:
Viss um að sín verði saknað.
Silvio Berlusconi gekk í gær á fund Carlos Azeglios Ciampis, forseta Ítalíu, og sagði af sér forsætisráðherraembættinu. Berlusconi hefur vikum saman neitað að viðurkenna ósigur sinn í þingkosningunum, sem haldnar voru 9. og 10. apríl.

"Þau eiga eftir að sakna mín," sagði hann stuttu áður en hann gekk á fund Ciampis, en eftir fundinn var hann kokhraustur og lofaði harðri stjórnarandstöðu. "Ég er ekkert að gefast upp," sagði Berlusconi. "Lýðræðið heldur áfram, stundum hægt, en það gerist," sagði Romano Prodi, leiðtogi vinstrimanna, og fagnaði um leið ákvörðun Berlusconis.

Ekki var samt ljóst í gær hvort Ciampi forseti myndi veita Prodi stjórnarmyndunarumboð. Kjörtímabil Ciampis í forsetaembættinu rennur út 18. maí og hann hefur áður sagt að hann vilji láta arftaka sínum í forsetaembættinu það eftir að veita næsta stjórnarmyndunarumboð.

"Ég vona að þetta pólitíska tómarúm standi ekki lengi yfir," sagði Prodi og gerir sér vonir um að Ciampi muni snúast hugur. "Ég er reiðubúinn að taka við embætti en ég hef ekki nefnt nákvæma dagsetningu við Ciampi forseta hvenær ég vil taka við."

RUV 02.05.2006
Berlusconi biðst lausnar
Síðasti ríkisstjórnarfundur Silvios Berlusconis, fráfarandi forseta Ítalíu, var haldinn í morgun. Að honum loknum gekk forsætisráðherrann á fund Ciampis forseta til að biðjast lausnar fyrir sig og ráðuneyti sitt.

Berlusconi lætur þar með af embætti eftir fimm ár við stjórn, en hann hefur setið lengur við völd en nokkur annar forsætisráðherra Ítalíu frá lokum síðar heimsstyrjaldar. Búist er við að Ciampi forseti biðji hann að sitja áfram þangað til ný stjórn hefur verið mynduð, en forsetinn mun líklega veita Romano Prodi, leiðtoga bandalags mið- og vinstriflokka, umboð til stjórnarmyndunar á næstu dögum, jafnvel fyrir vikulok.

Ciampi, sem brátt lætur af störfum, hafði vonast til að eftirmaður sinn hefði umsjón með stjórnarmyndun að loknum kosningum á dögunum, en mikill þrýstingur er á hann að fela Prodi að mynda stjórn sem fyrst. Prodi segist vonast til að hafa ráðherralista tilbúinn þegar kallið komi frá Ciampi. Flokkabandalag Prodis náði meirihluta í báðum deildum þingsins í kosningunum, þó naumlega í öldungadeildinni.

Framundan er hörð barátta um næsta forseta landsins, en kjörtímabil Ciampis rennur út 18. þessa mánaðar. Ítalskir fjölmiðlar telja líklegt að Massimo de'Alema, fyrrverandi forsætisráðherra, verði forsetaframbjóðandi mið- og vinstrimanna, en Berlusconi hefur nefnt Gianni Letta, aðstoðarráðherra, sem hugsanlegan frambjóðanda mið- og hægrimanna. Forsetinn er kjörinn á sameinuðu þingi.

22.04.2006 / Ruv.is
Rómverskur kardináli mælir með smokkum
Carlo Maria Martini, einn áhrifamesti kardináli rómversk kaþólsku kirkjunnar, styðjur kröfuna um að Páfagarður leyfi alnæmissmituðum að nota smokk. Kirkjan bannar notkun smokks, jafnvel í sóttvarnarskyni, og lítur eingöngu á smokkinn sem getnaðarvörn, sem hún telur stríða gegn vilja guðs.

Tímaritið L' Espresso hefur eftir kardinálanum, sem áður var biskup í Milanó, að auðvitað verði að nota smokk í sérstökum tilvikum, til dæmis þar sem hann ver maka gegn alnæmissmiti. Páfagarður hefur ekki brugðist opinberlega við sinnaskiptum kardinálans.

15.04.06 / Fréttablaðið
Benedikt páfi XVI á föstudaginn langa:
Eigingirni og erfðatæknin kvelja Krist
"Skipting heimsins í svæði velfarnaðar og svæði eymdar er kvöl Krists í dag," sagði hann við guðsþjónustu á föstudaginn langa í Róm. Á öðru svæðinu sagði hann fólk óttast offitu, á hinu dæi fólk úr fátækt, og spurði síðan: "Hvers vegna skiljum við ekki að hinir fátæku eru meðferðarúrræði hinna ríku?"

Á föstudaginn langa leiðir páfi jafnan táknræna píslargöngu þar sem áfangarnir á leið Krists upp á Golgatahæð eru raktir. Þar minnist hann pínu Krists og spyr hvað fólk getur af henni lært á okkar tímum. "Hvað er það sem sérstaklega kvelur líkama Krists á okkar tímum?" spurði páfi, og svaraði því til að engu líkara væri en fólk vildi "leggja niður fjölskylduna" og sagði það "djöfullegan hroka". Einnig nefndi hann erfðatækni nútímans, og sagði vísindamenn fremja synd með því að reyna að taka að sér hlutverk guðs.

15.04.06 / NFS
Impregilo þarf að svara fyrir meintar mútugreiðslur
Ítalska verktakafyrirtækið Impregilo, sem er aðalverktaki framkvæmdanna við Kárahnjúka, tapaði á fimmtudag áfrýjun fyrir dómstólum í Afríkinu Lesótó vegna meintra mútugreiðslna fyrirtækisins til embættismanna.

Impregilo er sakað um mútugreiðslur upp á um 80 milljónir króna til þess að vinna 500 milljarða króna samning um að reisa svokallaða Katse stíflu í Lesótó. Yfirvöld í Lesótó hava um árabil verið í herferð gegn spillingu og hafa hlotið hrós á alþjóðavettvangi fyrir að sækja stórfyrirtæki og embættismenn til saka. Dómsmálið sem Impregilo tapaði snerist um rétt dómstóla í Lesótó til að dæma í mútumálinu og niðurstaðan þýðir að Impregilo þarf að svara til saka fyrir meintar mútugreiðslur.


14.04.06 / Ruv.is
Páfi harðorður í hugvekju dagsins
Benedikt páfi XVI stýrir í fyrsta skipti helgum athöfnum í Páfagarði um páska. Í hugvekju sinni í dag, föstudaginn langa, fordæmir hann djöfullegan hroka nútímamannsins og dýrkun illskunnar.

Benedikt páfi segir ofdramb manna birtast átakanlegast í því að þeir telji sig þess umkomna að grípa fram fyrir hendur almættisins og breyta sköpunarverkinu með margvíslegum erfðabreytingum. Þeir hunsi vilja Guðs, setjist sjálfir í hásæti hans og hefji tilraunastarf sem sé ekkert annað en háskaleg brjálsemi. Þá grafi þeir undan fjölskyldunni og séu helteknir úrkynjaðri eigingirni.

Lundúnablaðið Times segir boðskap páfa, þar sem hann tali tæpitungulaust um skuggahliðar mannssálarinnar, syndina og ofmetnaðinn, stinga í stúf við boðskap margra annarra kirkjuhöfðingja sem leggi meiri áherslu á kærleika og fagnaðarerindi kristindómsins. Því megi búast við því að hugvekjurnar veki blendin viðbrögð katólskra manna.

13.04.06 / Ruv.is
Berlusconi að einangrast
Ýmsir samstarfsmenn Berlusconis, forsætisráðherra Ítalíu, draga í efa fullyrðingar hans um kosningasvik og telja að endurtalning atkvæða muni engu breyta um úrslit þingkosninganna á dögunum. Berlusconi hefur krafist þess að hluti atkvæða verði talinn aftur en Ciampi forseti hefur ekki gefið heimild til þess.

Ignazio La Russa, einn forystumanna Þjóðarbandalagsins, eins flokkanna í fylkingu Berlusconis, segist ekki hafa fengið neinar fregnir um kosningasvik. Ýmsar athugasemdir hafi verið gerðar við kosningarnar, en það sé ekkert nýtt. það gerist í hverjum kosningum. Lorenzo Cesa, leiðtogi Kristilegra demókrata UDC, segir að alltaf séu gerðar kannanir á hluta atkvæða, en hann telji engar líkur á að þær muni breyta niðurstöðum kosninganna.

12.04.2006 / Ruv.is
Ítalía: Prodi myndar ekki stjórn fyrr en í maí
Romano Prodi reiknar ekki með að geta myndað nýja ríkisstjórn fyrr en eftir 18. maí. Í viðtali á franskri útvarpsstöð í morgun, sagði hann að Carlo Azeglio, núverandi forseti, myndi líklega ekki standa fyrir stjórnarmyndunarviðræðum. Kjörtímabili hans lýkur 18. maí, en nýkjörið þing kýs nýjan forseta þegar það kemur saman 12. og 13. maí.

11.04.2006 / Ruv.is
Ítalía: Prodi hafnar Berlusconi
Romano Prodi, leiðtogi mið- og vinstrimanna á Ítalíu, hafnaði í dag tillögu Silvios Berlusconis, forsætisráðherra og leiðtoga fylkingar mið- og hægrimanna, um myndun samsteypustjórnarfylkinganna beggja svipaða og í Þýskalandi. Prodi lýsti í dag yfir sigri í þingkosningum á Ítalíu í gær og fyrradag en Berlusconi neitar að játa sig sigraðan fyrr en atkvæði hafa verið endurtalin.

Mjótt var á munum í kosningunum og ekki ljóst fyrr en í dag eða rúmum sólarhring eftir að kjörstöðum lauk, hvernig færi. Vinstri fylking Prodis hlaut meirihluta í báðum deildum þingsins, 348 þingsæti í neðri deild gegn 277. Munurinn var hinsvegar minni í efri deildinni, en þar munar einungis tveimur þingsætum, 158 á móti 156.

Berlusconi sagði í dag að rannsaka þyrfti fjölda tilfella þar sem ekki hefði verið rétt staðið að talningu atkvæða. Í kosningum til neðri deildar munaði einungis 25.000 atkvæðum á fylkingunum tveimur, en rúmlega 38 miljónir greiddu atkvæði. Verði talið aftur eða endi málið fyrir dómstólum kann það að dragast nokkuð að formleg úrslitverða staðfest.

Nokkur óvissa ríkir því um framhaldið og sérfræðingar segja að þótt Prodi myndi nýja ríkisstjórn hafi hann það nauman meirihluta að erfitt geti reynst að hrinda í framkvæmd nauðsynlegum umbótum í efnahagslífi landsins, en hagvöxtur hefur verið lítill á Ítalíu undanfarinn ár og enginn í fyrra. Prodi segist hinsvegar sannfærður um að geta myndað sterka stjórn sem sitji út næsta kjörtímabil.

9.4.2006 / Mbl.is
Ítalar ganga að kjörborðinu
Kjörstaðir voru opnaðir á Ítalíu klukkan 6 í morgun að íslenskum tíma en þingkosningar fara fram í landinu í dag og í morgun. Þar takast á Silvio Berlusconi, forsætisráðherra, og Romano Prodi, forsætisráðherraefni mið- og vinstriflokkanna. Mikil óvissa ríkir um úrslit því skoðanakannanir eru bannaðar síðasta hálfa mánuðinn fyrir kosningarnar en síðustu kannanirnar bentu til sigurs Prodis.

Kjörsókn var frekar lítil fyrst í morgun. Um það bil 50 manns kusu á fyrsta hálftímanum í Lungatevere della Farnesina í Róm, skammt frá Páfagarði. „Ég kaus þá sem vilja verja gildi okkar: Fjölskylduna, menntun og öryggi. Þetta eru ekki trúarleg gildi heldir þjóðfélagsins almennt," sagði nunna, sem kom á kjörstað eftir að hafa hlýtt á morgunmessu pálmasunnudags. Berlusconi, sem er 69 ára og ríkasti maður Ítalíu, hvatti kjósendur í kosningabaráttunni til að verja hina kristnu ímynd Ítala og fjölskyldugildi gegn kosningabandalagi Prodis. Í því eru m.a. kommúnistar, sem vilja lögleiða sambúð samkynhneigðra.

„Ég kaus vinstrimenn og vil að Berlusconi pakki niður," sagði Daniele Calente, ríkisstarfsmaður. „Ég ég óttast að fjölmiðlaárásir hans hafi haft áhrif og allar hans lygar." Prodi, sem er 66 ára og fyrrum forseti Evrópusambandsins. Honum tókst að mynda bandalag stjórnarandstöðuflokka sem inniheldur bæði miðflokka, jafnaðarmenn og kommúnista.

07.04.2006
Þingkosningar á Ítalíu
Kosið er ti þings á Ítalíu sunnudaginn 9. og mánudaginn 10. apríl. Ítalska Þingið, Parlamento, skiptist í efri og neðri deild, það er, fulltrúadeild, Camera dei deputati, sem 630 þingmenn sitja, og öldungadeild Senato, sem 315 sitja. Kosið er til hvorrar deildar um sig á fimm ára fresti. Alls eru um 49 milljónir manna á kjörskrá sem kjósa um þessi 945 sæti.

Kosið er eftir nýju og umdeildu kerfi hlutfallskosningar þar sem einfaldur meirihluti innan kjördæmis kemur einum og aðeins einum frambjóðanda áfram.

Helstu fylkingarnar sem klást eru sem fyrr Hús frelsisins, bandalag hægrimanna með forsætisráðherrann í broddi fylkingar og svo Ólívubandalagið, bandalag mið- og vinstri manna, sem Romano Prodi leiðir.

05.04.2006 / Rúv.is
Ítalía: Berlusconi mátti ekki fara í viðtal
Stjórnarandstaðan á Ítalíu neyddi í dag Berlusconi forsætisráðherra, til að hætta við að koma fram í einkaviðtali á besta útsendingartíma, á eigin sjónvarpsstöð. Mótframbjóðandinn Romano Prodi, þáði ekki boð um að koma í útsendinguna. Þegar vitnaðist um viðtalið, sem ekki var á auglýstri dagskrá, ærðist stjórnarandstaðan og minnti á strangar kosningareglur, sem kveða skýrt á um að hvað stjórnmálamenn mega og mega ekki vikuna fyrir kosningar.

Berlusconi varði ákvörðun sína og sagði það ekki brot á reglum, ef keppnautar í stjórnmálum fengju jafn mikinn tíma í sjónvarpi. Hann benti á að hann sæti fyrir svörum hjá vinstrisinnuðum blaðamönnum. Útvarpsréttarnefnd kannaðist ekki við að hafa leyft viðtalið við Berlusconi, eins og hann hélt fram, og hún lýsti yfir að viðtalið stríddi gegn lögum. Hætt var við viðtalið aðeins nokkrum klukkustundum fyrir útsendingu. Einn helsti gagnrýnandi Berlusconis utan Ítalíu er breska vikuritið The Economist, sem Berlusconi uppnefnir í staðinn „The Ecommunist“. Ritið, sem er þrátt fyrir uppnefni Berlusconis er talið hægri sinnað, hefur haldið uppi skipulegri gagnrýni á forsætisráðherrann ítalska síðustu misserin. Hefur það leitt til þess að Berlusconi hefur stefnt útgefendum þess fyrir dómara í Róm, en ritið á móti birt opin bréf til forsætisráðherrans.

The Economist hefur m.a. fullyrt að í stöðu sinni sem fjölmiðlaeigandi og formlegur yfirmaður ítalska ríkisútvarpsins ráði hann hann yfir 90% sjónvarpsefnis í landinu. Tök Berlusconis á fjölmiðlum landsins voru staðfest í rannsókn hinnar óháðu stofnunar Freedom House árið 2004.

04.04.2006 / Ruv.is
Ítalía: Prodi og Berlusconi takast á
Stóryrðin og klögumálin gengu á víxl í seinni sjónvarpskappræðum Silvios Berlusconis, forsætisráðherra Ítalíu, og Romanos Prodis, leiðtoga stjórnarandstöðunnar, í gærkvöld. Samkvæmt síðustu könnunum hefur stjórnarandstaðan allt að 5 prósentustiga forskot á stjórnarflokkanna fyrir þingkosningarnar á sunnudag.

Berlusconi lýsti yfir því að eignaskattur af fyrsta húsnæði almennings yrði afnuminn, ríkistekjur uppá 2,3 miljarða evra. Hann spilaði þessu trompi út seint í kappræðunum, þannig að Prodi gafst ekki ráðrúm til athugasemda fyrr en eftir þær. Hann sagði yfirlýsinguna ábyrgðarlausa á tímum þegar nauðsynlegt væri að taka ríkisfjármálin föstum tökum.

03.04.2006 / Ruv.is
Páfi messaði til minningar um fyrirrennara sinn
Benedikt páfi söng messu í dag til minningar um Jóhannes Pál páfa annan. Í gær var ár liðið síðan Jóhannes Páll páfi lést. Benedikt mærði fyrirrennara sinn, sagði hann hafa verið klett í trúnni, að trú hans hefði verið sterk og laus við ótta eða málamiðlanir. Í maí síðastliðnum felldi Benedikt úr gildi reglur um að 5 ár þyrftu að líða frá dauða tilvonandi dýrlings, og þangað til undirbúa mætti rannsókn á því hvort til greina kæmi að taka hann í dýrlingatölu.

Kirkjunnar menn rannsaka nú mál franskrar nunna sem læknaðist af einkennum Parkinsonsveiki eftir að hafa beðið til páfans. Ef satt reynist gæti það verið kraftaverkið sem kirkjan þarf á að halda til að taka Jóhannes Pál í dýrlinga tölu.

03.04.2006 / Ruv.is
17 mánaða gísl myrtur
Sautján mánaða drengur fannst látinn á Ítalíu í fyrradag, mánuði eftir að honum var rænt. Grímuklæddir menn réðust inn á heimili fjölskyldu Tommasos Onofri í grennd við Parma á Norður-Ítalíu. Foreldrarnir voru bundnir og barninu rænt.

Barnsránið hefur sett svip á ítalska fjölmiðlun undanfarinn mánuð. Páfi, forsetinn, listamenn og knattspyrnumenn sárbændu ræningjana um að sleppa barninu. Nú er ljóst að barnið var myrt stuttu eftir ránið. Búið er að handtaka múrara sem vann í húsi foreldranna og karlmann frá Sikiley. Þeir saka hvor annan um ódæðið. Ætlunin mun hafa verið að kúga fé út úr foreldrunum.

02.04.2006 / Ruv.is
Ártíðar Jóhannesar Páls páfa minnst
Búist er við að hundruð þúsunda taka þátt í minningarathöfnum um Jóhannes Pál páfa annan, í Karkov og í Varsjá í dag þegar þess er minnst að eitt ár er frá dauða hans. Þá verður kirkjuklukkum hringt um gjörvallt Pólland.

Talið er að tugir þúsunda pílagríma verði á Péturstorginu í Róm þegar páfa verður þar minnst. Margir leggja leið sína að gröf páfa undir Péturskirkjunni en þangað koma að jafnaði 10.000 gestir á dag.

02.04.2006 / Ruv.is
Stjórnarandstaðan hefur forskot
Stjórnarandstaðan á Ítalíu, bandalag 11 miðju- og vinstriflokka, hefur enn fimm prósentustiga forskot á stjórnarflokkanna þegar vika er til þingkosninga.

Meðan Silvio Berlusconi forsætisráðherra leggur sig í líma við að heilla kjósendur með djarflegum yfirlýsingum og gamansögum, tekur Romano Prodi, leiðtogi stjórnarandstöðunnar, annan pól í hæðina. Í viðtali við Sunday Telegraph viðurkennir Prodi að hann sé leiðinlegur, en það komi ekki að sök, hann sé traustur.

Kannanir benda til þess að Ítalir hafi fengið nóg af Berlusconi, fréttaskýrendur segja það ekki spilla fyrir Prodi að vera algjör andstæða forsætisráðherrans í sjón og raun. Prodi sé einsog vandræðalegur og óframfærinn sveitaprestur og það þyki ekki ókostur við nokkurn mann á Ítalíu.

30.03.2006 / Ruv.is
Berlusconi móðgar Kínverja
Silvio Berlusconi, forsætisráðherra Ítalíu, hefur vakið reiði stjórnvalda í Peking með staðhæfingum um að Kínverjar hafi soðið börn á valdatíma Maós, og notað þau sem áburð á akra. Berlusconi heyr harða kosningabaráttu þessa dagana, en á undir högg að sækja, kannanir benda til þess að stjórn hans bíði ósigur fyrir bandalagi miðju-og hægriflokka í næsta mánuði.

Á kosningafundi á sunnudag sagðist hann hafa lesið um barnadrápin í Svörtu bókinni um kommúnismann, þetta væru allt sögulegar staðreyndir. Formælandi utanríkisráðuneytis Kína segir þetta hins vegar staðlausa stafi. Kínverjar eru ekki síst gramir Berlusconi fyrir þá sök að þeir hafa helgað árið 2006 góðum samskiptum við Ítali. Berlusconi dró nokkuð í land í sjónvarpsviðtali í gærkvöld, viðurkenndi að þetta hefði verið skrýtla, og vissulega orkað tvímælis, hann hefði bara ekki getað haldið aftur af sér.

Þetta er ekki í fyrsta sinn að menn reka upp stór augu þessa dagana vegna yfirlýsinga forsætisráðherra Ítalíu. Þegar hann hóf baráttu fyrir kosningarnar í vor sagðist hann vera Jesús Kristur stjórnmálanna. Hann væri fórnarlamb, en gæddur þrautseigju, hann umbæri allt frá öllum og fórnaði sér fúslega fyrir sérhvern mann.

24.03.2006 / Ruv.is
Stjórnarandstaðan með forskot
Skoðanakannanir í ítölskum fjölmiðlum í dag, sýna að mið- og vinstriflokkar stjórnarandstæðinga, halda forskoti sínu á mið- og hægriflokkastjórn Berlusconis. Þingkosningar verða á Ítalíu 9-10. apríl.

Könnun sem birtist í La Republica í dag, sýnir að stjórnarandstæðingar hafa 5,1% forskot á stjórnarflokkanna í neðri deild þingsins. Í efri deildinni er bilið milli fylkinganna ívið minna. Frá morgundeginum verður óheimilt að birta niðurstöður skoðanakannanna á Ítalíu vegna þingkosninganna.

22.05.2006 / Fréttablaðið
Ítalir ófeimnir við fortíðina: Sýna glæsibyrgi Mussolinis
Nítjándu aldar glæsibygging í Róm verður í dag opnuð almenningi. Þar hafði Benito Mussolini aðsetur og hafði hann látið byggja nokkur neðanjarðarbyrgi við húsið, sem fólk fær nú aðgang að.

Mussolini lifði hátt og hélt miklar veislur í þessu húsi, en var við öllu búinn og gat brugðið sér niður í byrgin til þess að verjast loftárásum. Tvær stórar byggingar neðanjarðar voru byggðar með mikilli leynd og eru samtals tvö hundruð fermetrar að stærð. Eitt byrgið var sérhannað til að þola árásir eiturefna.

20.03.2006 / Fréttablaðið
Ítalskir blaðamenn: Engar fréttir á Ítalíu í gær
Blaðamenn allra helstu dagblaða Ítalíu lögðu niður störf á laugardag í mótmælaskyni við fyrirhugaðar breytingar á kjarasamningum, og þar af leiðandi komu fæst blöð út þar í landi á sunnudag. Sjónvarps- og útvarpsfréttamenn ætla sér að leggja niður störf á sunnudaginn.

Fréttamennirnir óttast að breytingar í kjarasamningum muni ógna prentfrelsi og starfsöryggi blaðamanna. Talsmenn forsætisráðherrans, Silvios Berlusconi, héldu því fram að verkfallið hefði verið haldið svo hann fengi ekki fréttaumfjöllun þessa daga. Kosningar verða haldnar í landinu í byrjun apríl.

13.03.2006 / Ruv.is
Berlusconi gekk út úr sjónvarpsviðtali
Silvio Berlusconi, forsætisráðherra Ítalíu, strunsaði út í miðju sjónvarpsviðtali í ítalska ríkissjónvarpinu í gær. Kosningar eru á Ítalíu í næsta mánuði og Berlusconi vildi greina frá því hverju stjórn hans hefði komið í verk undanfarin ár. Þáttarstjórnandinn vildi hins vegar fá skýringu hans á því hvers vegna hann væri einna helst þekktur erlendis fyrir stuðning sinn við Írakstríðið og hagsmunaárekstra, annars vegar auðjöfursins og hins vegar forsætisráðherrans Berlusconi. Berlusconi vildi ekki ræða stuðning sinn við Írakstríðið, sem er afar óvinsælt á Ítalíu, jós úr skálum reiði sinnar yfir þáttarstjórnandann og hvarf á braut. Samkvæmt könnunum hefur kosningabandalag mið- og vinstri flokkar undir forystu Romano Prodi þriggja og hálfs prósents forskot á kosningabandalag Berlusconis.

07.03.2006 / Fréttablaðið
Heimilisstörfin í Evrópu: Ítalskir karlmenn latir
Ítalskir og spænskir karlmenn standa sig verst allra karlmanna við að aðstoða maka sinn við heimilisstörfin samkvæmt nýrri könnun Eurostat. Eyða ítalskir karlmenn þannig aðeins 95 mínútum á dag við matseld, uppvask, þrif eða annað það sem telst öllu jöfnu til heimilisverka. Spænskir karlmenn eru vart hótinu betri með aðeins 97 mínútur að meðaltali daglega en það er tæplega klukkustund skemur en til að mynda karlmenn í Noregi og Svíþjóð segjast gera.

19.02.2006 / NFS
Gekk í bol með skopteikningu úr Jótlandspóstinum
Ítalskir ráðamenn reyna nú hvað þeir geta að lægja öldurnar meðal múslima, eftir að einn ráðherra ríkisstjórnarinnar móðgaði múslima með því að ganga í bol með einni af skopteikningu Jótlandspóstsins framan á. Í kjölfarið brutust út óeirðir við ítalska sendiráðið í Lýbíu með þeim afleiðingum að 11 manns létust. Ráðherrann hefur þegar sagt af sér, og ítalski utanríkisráðherran, Gianfranco Fini, heimsótti stærstu moskuna í Rómarborg í gærkvöldi, og hitti fulltrúa frá Arabalöndum til að freista þess að minnka ólguna. Forseti framkvæmdastjórnar Evrópusambandsins, Jose Manuel Barroso, fordæmdi ofbeldið og lýsti yfir stuðningi við ítölsku ríkisstjórnina í gær.

4.03.2006 / Fréttablaðið
Eiginmaður ráðherra í bresku stjórninni í ítalskri spillingarrannsókn: Ásakanir um mútuþægni
Tessa Jowell, menningarmálaráðherra Bretlands, braut ekki gegn siðareglum bresku ríkisstjórnarinnar með aðkomu sinni að fjármálaviðskiptum eiginmanns hennar. Þessu lýsti breski forsætisráðherran Tony Blair yfir á fimmtudag eftir að Sir Gus O'Donnell, æðsti embættismaður breska stjórnkerfisins, komst að þeirri niðurstöðu að Jowell hefði ekki gerst sek um slíkt brot. Blair sagðist bera fullt traust til Jowell.

Mál Jowell hefur verið fyrirferðamikið í bresku pressunni í vikunni. David Cameron, leiðtogi Íhaldsflokksins, kallaði eftir því að rannsókn á viðskiptum eiginmanns Jowell, lögmannsins David Mills, við ítalska forsætisráðherrann og auðkýfinginn Silvio Berlusconi verði víkkuð út. Mills sætir rannsókn af hálfu saksóknara í Mílanó í tengslum við hugsanlega málsókn vegna spillingar á hendur Berlusconi. Blair sagði að í opinberri rannsókn málsins verði "allar ásakanir sem fram koma" kannaðar.

Berlusconi er sakaður um að hafa fyrirskipað greiðslu upp á minnst 600.000 bandaríkjadali, andvirði um 39 milljóna króna, til Mills á árinu 1997. Greiðslan hafi verið mútur fyrir að bera ljúgvitni í réttarhöldum á árunum 1997 og 1998. Berlusconi og Mills segja ásakanirnar pólitískan róg. Í Sunday Times var greint frá því að veðlán sem Mills og Jowell tóku hafi verið liður í því að breiða yfir hina meintu mútugreiðslu.

4.03.2006 / NFS
Jowell hyggst skilja við eiginmann sinn
Tessa Jowell, menningarmálaráðherra Bretlands, ætlar að skilja við eiginmann sinn David Mills. Ítalskir saksóknarar sökuðu Mills á dögunum um að hafa þegið mútur frá Silvio Berlusconi, forsætisráðherra Ítalíu, gegn því að hann bæri ljúgvitni fyrir sig. Breska blaðið Guardian greindi svo frá því í morgun að Mills hefði ráðið mann til að stjórna fyrirtæki sínu sem hefði áður starfað sem milligöngumaður Berlusconi og ítölsku mafíunnar. Jowell hefur ávallt haldið sakleysi sínu fram og í vikunni lýsti Tony Blair forsætisráðherra því yfir að hún hefði ekki brotið siðareglur ríkisstjórnarinnar.

BARA HRESSIR! Berlusconi og Rocco Buttiglione, menningarmálaráðherra í nýju stjórninni og sá hinn sami og Evrópa hafnaði sem stjórnarliða í framkvæmdastjórn Evrópusambandsins. Mynd: AP