Ratað í og um hverfið
Það er örstutt úr miðbænum yfir í Trastevere - og er það tekið fram hér, því farvegur Tíber ruglar mann dulítið í áttum. Auðvelt og stutt er að ganga frá Campo de'Fiori hverfinu yfir í ekki ólíflegra hverfi Trastevere. Þá er t.d. tekin Via dei Giubbonari frá Campo de'Fiori torgi og svo beygt niður (t.h.) via del Arco del Monte og haldið áfram via dei Pettinari sem tekur beint við af henni. Þá er maður kominn niður að Tíber og að enda Júlíugötu. Við blasir Sixtusarbrú sem Sixtus páfi IV. lét byggja fyrir júbilárið 1475 og var gerð upp í tilefni síðasta Júbileums árið 2000. Þessa gömlu göngubrú gengur maður yfir á vesturbakkann og er þá komið á Trilussatorg sem kennt er við ítalska skáldið svokallaða.

Þá er um tvær leiðir helstar að velja inn í hverfið og ef þær eru báðar gengnar þá fæst ágætis útsýnishringur. Til þess að komast beint inn á Maríutorg er tekin Máragata (via del Moro) sem er manni á vinstri hönd, henni fylgt út á enda og þá sést á hægri hönd inn á torg Söntu Maríu í Trastevere. Hin leiðin er að ganga upp götuna á hægri hönd við gosbrunninn og torgið, via di Benedetta, og beygja svo trax til vinstri inn vicolo del Bologna og svo aftur strax upp til hægri. Þá kemur inn á lítið torg, piazza della Scala, en beygt inn t.v. samnefndra götu, via della Scala, og hún gengin að piazza Egidio torginu og þá beygir maður t.v. niður þrönga götu sem liggur að Maríutorgi.

Einnig er auðvelt að ganga út í hverfið frá Largo di Torre Argentina torginu (þaðan rennur einnig sporvagn númer 8 frá leikhúsinu fræga, en tekur því tæpast) og niður via Arenula, yfir Ponte Garibaldi brúnna og þá er maður kominn. Svo beygt til hægri og gengið eftir via della Lungaretta til að komast inn á aðaltorgið piazza Santa Maria in Trastevere.